قصيدة مبايعة

(مارس ٢٠٠٥ )

ناصر صلاح

ابعدوا عنه وسيبوه
هو ناقص ضغطكوا.. هتموتوه
يعني فاضل كام في عمره.. سننوه
زي ابوكم.. زي جدي.. فوّتوا واتحملوه
ليه يا عالم في النهايه بتحرجوه
@@@
خد علينا وخال علينا.. فاعذروه
نفسه يرأس فتره ساتَّه.. رقصوه
والله ضفره ما هتجيبوه
دا السلام والحرب هوه.. تنكروه
عمركم ما تعوضوه
عاوز ابنه يجي بعده.. بَعدوه
ما الولد طالع لابوه
وانتوا شايفين اليهود والأمريكان
زهقوا منه وحطوا خطه يغيروه
نفسهم طرطور جديد.. ويترتروه
هو منكم.. مهما جار دايما عليكم.. أيدوه
ما انتوا صابرين ربع قرن
ربع تاني وبالجمايل حملوه
ما انتوا من يوم ما اتولد.. بتعشموه

ليه يا عالم في النهايه بتحرجوه
مش كفايه إن حلمه
يعمل أحمد فيلم عنه
مات وماتحققش منه.. حتى مشهد … ارحموه

*****************

**********

بقـلــع الضــرس

وقلعك كان بقلع الضرس
ما كناش م الألم بنام
ولا نبطل صراخ بالليل
فكم نشف دماغه وقام
وياما صبرنا أه ياما
أخدنا لبوس وبرشامه
وكم قال الأطبا خلاص
علاجنا تقوم لنا قيامه
وقلع الضرس ما يكفي
فتحت الضرس كم دمل
وكم خراج بيرعاه سوس
تقلش تتار تقلش باسوس
فمطلوب ع السريع حاجتين
لمدة شهر أو شهرين
هنتمضمض بثورة الصبح
وبالليل غاز مسيل للعين
********